Poetry Explorer- Classic Contemporary Poetry, THE AUL' KIRKYARD, by JANET HAMILTON


Poetry Explorer

Classic and Contemporary Poetry

THE AUL' KIRKYARD, by                     Poet's Biography
First Line: The aul' kirkyard! - the aul' kirkyard!
Last Line: The grave aneath the brier sae green.
Alternate Author Name(s): Hamilton, Janet Thompson
Subject(s): Death; Graves; Dead, The; Tombs; Tombstones


THE aul' kirkyard!—the aul' kirkyard!—
It's crowdit graves an' mossy stanes;—
I've coft me there a lanely grave,
In whilk I houp to lay my banes.

A rosy brier hings ower the spat,
An' there the mavis bigs her nest:
Ye'll hear her sing at e'en an' morn,
An' see her bonny speckled breast

The shilfa an' the yeldrin there
Mak' simmer haunt, an' hap an' sing
Amang the flow'ry twigs that ower
The lanely grave their blossoms fling.

The e'e o' Heaven leuks brichtly doun
Oot thro' the brier on simmer days;
At nicht the sweet an' bonny mune
Sheds doun her mildest, holiest rays.

An' there my sainted mither lies—
They laid her 'neath the brier to sleep;
An' I, her wae an' weary bairn,
Maun sune into her bosom creep.

An' lang an' soun' my sleep shall be;
I'll never wauken till I hear
The trump o' God, that bids the deid
Arise, an' at His bar appear.

My he'rt is fu' an' unco sair
At tales o' wrang, an' wrath, an' guilt;
The flesh is creeping on my banes
To hear o' a' the bluid that's spilt:

To think hoo mony sinfu' sauls
Are soopit aff the shores o' life—
Unrepentant, unforgiven—
By burnin' drink an' bluidy strife.

O aul' kirkyard! O aul' kirkyard!
Hoo aft ha'e I, wi' langin' e'en,
Leuk't ower thy moulderin' wa' to see
The grave aneath the brier sae green.





Discover our Poem Explanations and Poet Analyses!


Other Poems of Interest...
Home: PoetryExplorer.net