Classic and Contemporary Poetry
WEE JOUKYDAIDLES, by JAMES SMITH (1824-) First Line: Wee joukydaidles, toddlin' oot and in Last Line: I'll see my bonnie bairnie a braw, braw lass! Subject(s): Babies; Infants | ||||||||
WEE Joukydaidles, toddlin' oot and in: Oh, but she's a cuttie, makin' sic a din! Aye sea fou' o' mischief, an' minds na what I say: My very heart gangs loup, loup, fifty times a day! Wee Joukydaidles -- Where's the stumpy noo? She's tumblin' i' the cruivie, an' lauchin' to the soo! Noo she sees my angry e'e, an' aff she's like a hare! Lassie, when I get ye, I'll scud ye till I'm sair! Wee Joukydaidles -- Noo she's breakin' dishes; Noo she's soakit i' the burn, catchin' little fishes; Noo she's i' the barn-yard, playin' wi' the fouls -- Feeding them wi' butter-cakes, snaps, an' sugar-bools. Wee Joukydaidles -- Oh my heart it's broke! She's torn my braw new wincey, to mak' a dolly's frock. There's the goblet owre the fire! the jaud! she weel may rin! No a tattie ready yet, an' faither comin' in! Wee Joukydaidles -- Wha's sae tired as me! See! the kettle's doun at last! waes me for my tea! Oh, it's angersome, atweel, an' sune'll mak' me grey: My very heart gangs loup, loup, fifty times a day! Wee Joukydaidles -- Where's the smoukie noo? She's hidin' i' the coal-hole, cryin' "Keekybo!" Noo she's at the fireside, pu'in' pussy's tail -- Noo she's at the broun bowl, suppin' a' the kail! Wee Joukydaidles -- Paidlin' i' the shower -- There she's at the wundy! haud her, or she's owre! Noo she's slippit frae my sicht: where's the wean at last? In the byre amang the kye, sleepin' soun' and fast! Wee Joukydaidles -- for a' ye gi'e me pain, Ye're aye my darlin' tottie yet -- my ain wee wean! An' gin I'm spared to ither days -- Oh may they come to pass! -- I'll see my bonnie bairnie a braw, braw lass! | Discover our Poem Explanations and Poet Analyses!Other Poems of Interest...A POET TO HIS BABY SON by JAMES WELDON JOHNSON BABYHOOD by ELIZABETH AKERS ALLEN INFANCY by EDMUND JOHN ARMSTRONG BALLAD OF THE LAYETTE by WAYNE KOESTENBAUM A TOAST FOR LITTLE IRON MIKE by PAUL MARIANI THE PAMPERING OF LEORA by THYLIAS MOSS ONE FOR ALL NEWBORNS by THYLIAS MOSS IN THE THRIVING SEASON by LISEL MUELLER BURD AILIE by JAMES SMITH (1824-) |
|